ઉમરઝર પ્રાથમિક શાળાની કૃતિ તાલુકા કક્ષાના વિજ્ઞાનમેળામાં પ્રથમ સ્થાને

ઉમરપાડા તાલુકામાં વિજ્ઞાન અને નવીનતા પ્રત્યે વિદ્યાર્થીઓમાં રસ જાગે તે હેતુસર તાલુકા કક્ષાના વિજ્ઞાનમેળાનું આયોજન કરવામાં આવ્યું હતું. કાર્યક્રમ 156 માંગરોળ વિધાનસભાના માનનીય ધારાસભ્ય ગણપતભાઈ વસાવાના અધ્યક્ષસ્થાને યોજાયો હતો. મેળામાં કુલ પાંચ વિભાગોમાંથી 45 જેટલી કૃતિઓ પ્રદર્શન માટે મૂકવામાં આવી હતી. તમામ કૃતિઓમાં ઉમરઝર પ્રાથમિક શાળાના વિદ્યાર્થી વૈજ્ઞાનિકોની ખેતી આધારિત નવતર કૃતિ “પ્રકાશ પિંજર” વિશેષ આકર્ષણનું કેન્દ્ર બની. નવીન વિચારસરણી અને કૃતિની ઉપયોગિતા આધારે નિર્ણાયકો દ્વારા ઉમરઝર પ્રાથમિક શાળાની કૃતિને પ્રથમ સ્થાન એનાયત કરવામાં આવ્યું હતું. આ કૃતિના આયોજન અને રજૂઆત પાછળ ગણિતની શિક્ષિકા નિમિષાબેન વસાવાનું માર્ગદર્શન મહત્વપૂર્ણ રહ્યું હતું. તેમના માર્ગદર્શન હેઠળ બાળ વૈજ્ઞાનિક અનય કુમાર મુકુંદભાઈ ચૌધરી તથા અવંતિકાબેન અનિલભાઈ વસાવાએ કૃતિનું સુંદર પ્રેઝન્ટેશન આપી સૌનું ધ્યાન ખેંચ્યું. શાળાના આચાર્ય મુકુંદભાઈ ચૌધરીએ વિજેતા ટીમને અભિનંદન પાઠવતા જણાવ્યું કે વિદ્યાર્થીઓની આ સિદ્ધિ શાળાનો ગૌરવ વધારવાની સાથે STEM આધારિત શિક્ષણ તરફ એક સકારાત્મક પગલું છે. તેમણે સમગ્ર ટીમ, માર્ગદર્શક શિક્ષિકા, ગામના યુવા સરપંચ પ્રીતેશભાઈ વસાવા તથા વિજ્ઞાનમેળા આયોજકોએ પણ શુભેચ્છાઓ આપી. વિજ્ઞાન, કૃષિ અને નવીન ટેકનોલોજીનું સુંદર સંગમ રજૂ કરતી “પ્રકાશ પિંજર” કૃતિએ ઉમરઝર પ્રાથમિક શાળાનું નામ તાલુકા સ્તરે ઉજ્જવળ કર્યું છે.

