રૂ.૨ કરોડના ખર્ચે નવનિર્મિત દિપડાઓ માટેના રેસ્કયુ સેન્ટર અને પ્રાથમિક આરોગ્ય કેન્દ્રનું લોકાર્પણ કરતા વન અને પર્યાવરણ મંત્રી અર્જુનભાઈ મોઢવાડિયા

સુરત જિલ્લાના માંડવી તાલુકાના ખોડાંબા ગામે રૂ.૨ કરોડના ખર્ચે દિપડાઓ માટે નવનિર્મિત રેસ્કયુ સેન્ટર અને પ્રાથમિક આરોગ્ય કેન્દ્રનું વન અને પર્યાવરણ મંત્રી શ્રી અર્જુનભાઈ મોઢવાડિયાના હસ્તે લોકાર્પણ કરાયું હતું. માનવના સંઘર્ષમાં આવેલા કે કોઈ ઈજાગ્રસ્ત થયેલા, માનવભક્ષી દિપડાઓ માટે વનવિભાગ દ્વારા રેસ્કયુ સેન્ટર બનાવવામાં આવ્યું છે. એક હેકટર વિસ્તારમાં બનેલા આ સેન્ટરમાં ૨૦ દિપડાઓને રાખવાની કેપેસિટી સાથે ડોકટર રૂમ, પોસ્ટ મોર્ટમ રૂમ, સ્ટોર રૂમ, ફુડ તથા સ્મશાન સહિત અનેક સુવિધાઓ ઉપલબ્ધ કરવામાં આવી છે.

આ પ્રસંગે મંત્રીએ જણાવ્યું હતું કે, આ વિસ્તારમાં દિપડાઓની સંખ્યા વધી છે ત્યારે સ્થાનિક ગ્રામજનો સાથે સંઘર્ષમાં આવેલા દિપડાઓ માટે નિર્મિત આ સેન્ટરમાં દિપડાઓને અલગ રાખીને સારવાર સહિતની સુવિધાઓ ઉપલબ્ધ કરવામાં આવી છે. આ અવસરે એક પેડ મા કે નામ અભિયાન અંતર્ગત મંત્રીશ્રી તથા અન્ય મહાનુભાવોના હસ્તે વૃક્ષારોપણ કરવામાં આવ્યું હતું.

આ પ્રસંગે સાંસદ પ્રભુભાઈ વસાવા, ધારાસભ્ય શ્રી કુંવરજીભાઈ હળપતિ, અધિક અગ્ર મુખ્ય વનસંરક્ષક સંજયકુમાર શ્રીવાસ્તવ, સુરત વર્તુળના વનસંરક્ષક પુનિત નૈયર, સુરતના નાયબ વનસંરક્ષક ધીરજકુમાર, માંડવી દક્ષિણના રેન્જ ફોરેસ્ટ ઓફિસર શ્રી એચ. જે. વંદા, મદદનીશ વન સંરક્ષક એચ. આર.જાદવ તથા ગ્રામજનો ઉપસ્થિત રહ્યા હતા.