જિલ્લા ચૂંટણી અધિકારી અને કલેકટરના અધ્યક્ષ સ્થાને SIR હેઠળ ધારાસભ્યો, વિવિધ રાજકીય પક્ષોના પ્રતિનિધિઓ અને મતદાર નોંધણી અધિકારીઓ સાથે બેઠક યોજાઈ

મતદારયાદીની ખાસ સઘન સુધારણા કાર્યક્રમ (SIR) હેઠળ જિલ્લા ચૂંટણી અધિકારી અને કલેકટર ડૉ.સૌરભ પારધીના અધ્યક્ષ સ્થાને ધારાસભ્યો, વિવિધ રાજકીય પક્ષોના પ્રતિનિધિઓ અને મતદાર નોંધણી અધિકારીઓ(ERO) સાથે કલેકટર કચેરી ખાતે બેઠક યોજાઈ હતી. કલેકટરે જિલ્લામાં રવિવારે યોજાનારા આખરી ખાસ કેમ્પની કામગીરીમાં વધુમાં વધુ ફોર્મ પરત આવે તે માટે સૌ ધારાસભ્યો, રાજકીય પક્ષોના અગ્રણીઓના સહકારની અપેક્ષા વ્યક્ત કરી હતી. અધિક જિલ્લા ચુંટણી અધિકારીએ જિલ્લામાં અત્યાર સુધી ભરાયેલા એમ્યુનરેશન ફોર્મ(EF)ની માહિતી આપતા કહ્યું કે, સુરતની ૧૬ વિધાનસભાઓ મળી કુલ ૪૮,૭૩,૫૧૨ મતદારો પૈકી ૩૨,૮૩,૫૦૦ મતદારો એટલે કે ૬૭.૩૭ ટકા મતદારોના ફોર્મ પરત થયાં છે. સાથે જ દરેક વિધાનસભામાં વોર્ડ વાઈઝ થયેલી કામગીરીની વિગતો આપી હતી.

જિલ્લા ચૂંટણી અધિકારીએ ધારાસભ્યશ્રીઓ અને વિવિધ રાજકીય પક્ષોના પ્રતિનિધિઓ, મતદાર નોંધણી અધિકારીઓને તેમના વિસ્તારના લોકોને જાગૃત કરી રવિવારના ખાસ કેમ્પમાં બાકી રહી ગયેલા મતદારોનાં ગણતરી ફોર્મ ભરાવી સુપરત મેળવવા અનુરોધ કર્યો હતો.સાથે જ વિવિધ પક્ષો દ્વારા અધિક ચુંટણી અધિકારી સમક્ષ વોર્ડ વાઈઝ લીસ્ટ મેળવવા, મતદારોને ત્યાં જાતે જઈ ફોર્મ ભરી પરત મેળવવા, બુથની યાદી જાહેર કરવા, મતદારોમાં સ્થળાંતર કે મરણ અંગેના પુરાવાઓ વિષે રજૂઆત કરવામાં આવી હતી.અધિક જિલ્લા ચુંટણી અધિકારીએ સુરત જિલ્લામાં સમાવિષ્ટ વિધાનસભા બેઠકોના મતદાર નોંધણી અધિકારીઓને ઓછા ફોર્મ ભરાયા હોય તેવા તેમજ સ્લમ કે કારીગરોની વસાહત વાળા વિસ્તારને ઓળખી ત્યાં જાગૃતિ લાવવા ખાસ નાઈટ કેમ્પનું આયોજન કરવાનું સુચન કર્યું હતું.

બેઠકમાં ધારાસભ્ય સર્વ શ્રી પુર્ણેશભાઈ મોદી, વિનુભાઇ મોરડીયા, કાંતીભાઈ બલર, સંગીતાબેન પાટીલ, I/C નિવાસી કલેકટર ડી.ડી.શાહ સહિત વિવિધ રાજકીય પક્ષોના પ્રતિનિધિઓ અને મતદાર નોંધણી અધિકારીઓ હાજર રહ્યા હતા.