સુરત જિલ્લાના ૧૬૦૦૦ ઉપરાંત અસરગ્રસ્ત ખેડૂતોમાંથી માત્ર ૨૧૦૦ ખેડૂતોને સહાય મળી!!

સુરત જીલ્લાનાં કમોસમી વરસાદનાં કારણે ૨૪ હજાર કરતા વધારે ખેડૂતો અસરગ્રસ્ત હોવા છતા હાલપર્યત ૧૬૫૬૫ ખેડૂતોએ સહાય અરજી દાખલ કરી છે. જેને પગલે હવે ખેતી નિયામક દ્વારા અરજી કરવાની સમય મર્યાદા ૨૮ તારીખથી લંબાવીને ૫ ડિસેમ્બર કરવામાં આવી છે. ખેતીપાકમાં થયેલા નુકશાન બદલ સુરત જિલ્લામાં અત્યારસુધી કુલ ૨૧૦૦ ખેડૂતોને ૪.૫૦ કરોડની સહાય ચુકવવામાં આવી હોવાનું જાણવા મળે છે.

પ્રાપ્ત માહિતી અનુસાર માવઠાનાં કારણે ખેડૂતોને મોટું નુકસાન વેઠવું પડ્યું હતું. સુરત જિલ્લામાં કુલ ૨૪ હજારથી વધુ ખેડૂતોનાં પાકને માવઠાની આડ અસર પહોંચી હતી ખેડૂતને તેમના પાકની નુકશાનીનું વળતર મેળવવા માટે રાજય સરકાર તરફથી ૨૮ નવેમ્બર સુધીમાં ઓનલાઈન અરજી કરવાનું જણાવવામાં આવ્યું હતુ, જેમાં અત્યારસુધીમાં કુલ ૧૬૫૬૫ અરજીઓ ખેતીવાડી વિભાગને મળી છે. અને હવે અરજી કરવાની સમય મર્યાદા વધારીને ૫ ડિસેમ્બર કરવામાં આવી છે. ખેતીવાડી વિભાગ તરફથી જાહેર કરવામાં આવ્યું હતુ કે અત્યાર સુધીમાં ૨૧૦૦ ખેડૂતોને કુલ રૂ. ૪.૫૦ કરોડની સહાય જમા થઈ ચુકી છે. અને બાકી રહેલી અરજીઓની સ્કુટિની ચાલુ છે, અને આગામી દિવસોમાં વધુ ખેડૂતોને ચૂકવવામાં આવનાર હોવાનું જાણવા મળે છે.