ગુજરાત સરકારના કર્મચારીને વર્ષ 2026માં મળશે ર3 જાહેર રજા

ગુજરાત સરકારે વર્ષ ૨૦૨૬માં સરકારી કચેરીઓ માટે જાહેર રજાનું કેલેન્ડર જાહેર કર્યું છે, સામાન્ય વહીવટ વિભાગે ગુરુવારે આ સંદર્ભે જાહેરનામું બહાર પાડયું છે. રાજ્ય સરકારની કચેરીઓમાં વર્ષ ૨૦૨૬માં કુલ ૨૩ રજાઓ જાહેર થઈ છે. કેલેન્ડર વર્ષ ૨૦૨૬માં દિવાળી, મહા શિવરાત્રી અને પરશુરામ જયંતી રવિવારે જાહેર રજાના દિવસે જ હોવાથી કેલેન્ડરમાં તે સામેલ નથી. ફરજિયાત રજાઓ ઉપરાંત ૩૫ મરજિયાત રજા પણ જાહેર કરાઈ છે. રાજ્ય સરકાર હસ્તકના બોર્ડ, કોર્પોરેશન તેમજ પંચાયત કર્મચારીઓ માટે પણ આ હુકમ લાગુ પડે છે. રાજ્ય સરકારે બેંકો માટે ૧૮ રજાઓ જાહેર કરી છે. જાન્યુઆરીમાં ૨૬મીએ પ્રજાસત્તાક દિવસ સોમવારે આવે છે જ્યારે ૨૪મીએ ચોથો શનિવાર, ૨૫મીએ રવિવાર છે, આમ સરકારી કર્મચારીઓને અધિકારીઓ, એકસાથે ત્રણ રજા મળી રહેશે. એ જ રીતે જૂન મહિનામાં ૨૬મીએ શુક્રવારે મહોરમની રજા જાહેર કરાઈ છે, એ પછી ૨૭મીએ ચોથો શનિવાર અને ૨૮મીએ રવિવાર હોઈ સળંગ ત્રણ રજા મળશે.