અંગદાનનો મહાયજ્ઞ : 222 અંગદાતાના અંગદાનથી 713 વ્યક્તિને નવજીવન મળ્યું

અમદાવાદ સિવિલ હોસ્પિટલે અંગદાનના ક્ષેત્રમાં એક નવો માઈલસ્ટોન હાંસલ કર્યો છે. હોસ્પિટલમાં તાજેતરમાં ગુપ્તદાન સ્વરૂપે 222મું અંગદાન થયું. જેના થકી એક લીવર અને બે કિડનીનું દાન મળ્યું છે. આ અવિરત સેવા દ્વારા હોસ્પિટલે કુલ 735 અંગોનું દાન મેળવીને 713 જરૂરિયાતમંદ દર્દીઓને નવું જીવન પ્રદાન કર્યું છે.

પ્રાપ્ત માહિતી અનુસાર સિવિલ હોસ્પિટલમાં ગુપ્તદાન સ્વરૂપે થયેલા 222માં અંગદાનની વિગતો જોઈએ તો, સિવિલના ICUમાં દાખલ મધ્યપ્રદેશના 44 વર્ષીય પુરુષ દર્દી સારવાર દરમિયાન 25 નવેમ્બરે બ્રેઈનડેડ જાહેર થયા હતા. હોસ્પિટલની અંગદાન ટીમના ડૉ. મોહિત ચંપાવત દ્વારા દર્દીના સગાઓને સમજાવતા તેઓએ અંગદાનની સંમતિ આપી હતી. આ અંગદાનથી મળેલી બે કિડની અને એક લીવરને સિવિલ મેડિસિટી કેમ્પસની જ કિડની હોસ્પિટલના જરૂરિયાતમંદ દર્દીઓમાં પ્રત્યારોપણ કરાશે. ચક્ષુદાન સ્વરૂપે થયેલા અંગદાનના બીજા એક કિસ્સામાં અમદાવાદના અમરાઈવાડીના 23 વર્ષીય શ્વેતાબેન પ્રજાપતિ નામના દર્દી મૃત્યુ પામતા સ્ટાફ દ્વારા આઈ ડોનેશન માટે સમજાવતા. પરિવારજનોએ તેમની આંખોનું દાન કર્યું હતું.

અંગદાન પાછળ 48થી 72 કલાકની જટિલ પ્રક્રિયા હોય છે
દર્દી બ્રેઇન ડેડ માલુમ પડે ત્યારથી તેના મેનેજમેન્ટ, એપનીઆ ટેસ્ટ કરી બ્રેઇન ડેડ પ્રમાણિત કરવું, ત્યારબાદ દર્દીના પરિવારજનોનું કાઉન્સેલિંગ કરી અંગદાન માટે સંમતિ લેવી તથા સોટો(SOTTO) સાથે અને અંગો જે હોસ્પિટલોના દર્દીઓને પ્રત્યારોપણ માટે ફાળવવામાં આવે તેમની સાથે સંકલન કરી ઓપરેશનનો સમય નક્કી કરવો. અંગો જે તે હોસ્પિટલમાં સમયસર પહોંચતા કરવા જરૂરી ગ્રીન કોરીડોર માટે પોલીસ સાથે તેમજ ડેડ બોડીના પોસ્ટમોર્ટમ માટે પોલીસ અને પોસ્ટમોર્ટમના ડોક્ટર સાથે સંકલન કરવું, એમ આ એક જટિલ પ્રક્રિયા હોવાનું ડોક્ટરે જણાવ્યું છે.