Voice of Surat

ઉધના પોલીસની મોટી સફળતા: મોબાઇલ લૂંટ અને ચોરીના પાંચ ગુનાઓનો ભેદ ઉકેલાયો!

Posted On: |3 min read
પાંચ આરોપીઓ ઝડપાયા, છ લૂંટાયેલા મોબાઇલ સહિત કુલ રૂ. 1.68 લાખનો મુદ્દામાલ કબજે; લૂંટમાં ઉપયોગમાં લેવાયેલી બે મોટરસાઇકલ પણ જપ્ત

સુરત શહેરમાં મોબાઇલ લૂંટ અને ચોરીની ઘટનાઓને અંજામ આપતા તત્વો સામે ઉધના પોલીસની સર્વેલન્સ ટીમે મોટી કાર્યવાહી કરી છે. પોલીસે સંયુક્ત બાતમી અને ટેકનિકલ માહિતીના આધારે પાંચ આરોપીઓને ઝડપી પાડી મોબાઇલ લૂંટના ચાર અને મોબાઇલ ચોરીનો એક મળી કુલ પાંચ ગુનાઓનો ભેદ ઉકેલ્યો છે. પોલીસ દ્વારા આરોપીઓ પાસેથી છ લૂંટાયેલા મોબાઇલ, ત્રણ આરોપીઓના મોબાઇલ તથા ગુનામાં ઉપયોગમાં લેવાયેલી બે મોટરસાઇકલ સહિત કુલ રૂ. 1,68,000નો મુદ્દામાલ કબજે કરવામાં આવ્યો છે.

સૂત્રો પાસેથી પ્રાપ્ત થતી માહિતી અનુસાર સુરત શહેર પોલીસ કમિશનર વાબાંગ જમીર, અધિક પોલીસ કમિશનર બલરામ મીણા (સેક્ટર-1), નાયબ પોલીસ કમિશનર ડૉ. કાનન દેસાઈ (ઝોન-2) તથા મદદનીશ પોલીસ કમિશનર સી.જી. વાડદોરિયાના માર્ગદર્શન હેઠળ લૂંટ અને ચોરીના ગુનાઓમાં સંડોવાયેલા આરોપીઓને ઝડપી પાડવા સૂચના આપવામાં આવી હતી. ઉધના પોલીસ સ્ટેશનના પોલીસ ઇન્સ્પેક્ટર આર.એમ. ઠાકોર તથા બીજા પોલીસ ઇન્સ્પેક્ટર જે.કે. ગઢવીના માર્ગદર્શન હેઠળ સર્વેલન્સ પોલીસ સબ ઇન્સ્પેક્ટર વી.એમ. ડેરની આગેવાનીમાં ટીમે ઉધના, પાંડેસરા અને અલથાણ વિસ્તારમાં તપાસ હાથ ધરી હોવાનું જાણવા મળે છે.

પાંચ આરોપીઓને ઝડપી પાડ્યા છે. જેમાં:

  1. મનદીપ ઉર્ફે બબ્બુ અશોક પાલ (ઉં.વ. 21)
  2. જયેશ ઉર્ફે બબ્બુ પિયુષ યાદવ (ઉં.વ. 18)
  3. રવિ ઉર્ફે રવિશંકર ઉર્ફે ટણીયા વિજય યાદવ (ઉં.વ. 22)
  4. વિકાસ ઉર્ફે છોટુ હેમરાજ પાંડે (ઉં.વ. 21)
  5. રાજુ શેષનાથ ગૌડ (ઉં.વ. 22)

આરોપીઓ સુરતના પાંડેસરા અને બમરોલી વિસ્તારમાં રહેતા હોવાનું તથા તેમના મૂળ વતન ઉત્તર પ્રદેશ અને બિહારનાં અલગ-અલગ જિલ્લાઓમાં હોવાનું પોલીસ પ્રેસનોટમાં જણાવાયું છે.

ઉધના, પાંડેસરા અને અલથાણના પાંચ ગુનાઓ ડિટેક્ટ

પોલીસ તપાસમાં ઉધના પોલીસ સ્ટેશનનો એક, પાંડેસરા પોલીસ સ્ટેશનના ત્રણ અને અલથાણ પોલીસ સ્ટેશનનો એક મળી કુલ પાંચ ગુનાઓનો ભેદ ઉકેલાયો છે. આરોપીઓ પાસેથી વિવિધ કંપનીના છ મોબાઇલ ફોન કબજે કરાયા છે.

રૂ. 1.68 લાખનો મુદ્દામાલ જપ્ત

પોલીસે આરોપીઓ પાસેથી કબજે કરેલા મુદ્દામાલમાં ત્રણ ચાકુ, બે સ્પ્લેન્ડર મોટરસાઇકલ, આરોપીઓના ત્રણ મોબાઇલ ફોન તથા લૂંટ અને ચોરીના છ મોબાઇલ ફોનનો સમાવેશ થાય છે.

  • બે મોટરસાઇકલની કિંમત: રૂ. 90,000
  • આરોપીઓના ત્રણ મોબાઇલની કિંમત: રૂ. 20,000
  • લૂંટ અને ચોરીના છ મોબાઇલની કિંમત: રૂ. 58,000
  • કુલ મુદ્દામાલ: રૂ. 1,68,000

કેટલાક આરોપીઓનો ગુનાહિત ઇતિહાસ પણ સામે આવ્યો

પોલીસ પ્રેસનોટ મુજબ કેટલાક આરોપીઓ સામે અગાઉ પણ ગુનાઓ નોંધાયેલા છે. જેમાં મનદીપ ઉર્ફે બબ્બુ સામે વેસુ અને અલથાણ પોલીસ સ્ટેશનમાં અગાઉના ગુનાઓનો ઉલ્લેખ છે. રાજુ શેષનાથ ગૌડ સામે સુરત શહેર ડી.સી.બી. પોલીસ સ્ટેશનમાં આર્મ્સ એક્ટ હેઠળ ગુનો નોંધાયેલો હોવાનું જણાવાયું છે. અન્ય આરોપીઓના અગાઉના ગુનાહિત ઇતિહાસનો પણ પ્રેસનોટમાં ઉલ્લેખ કરવામાં આવ્યો છે.

ઉધના સર્વેલન્સ ટીમની કામગીરી પ્રશંસનીય

આ સમગ્ર કામગીરી પોલીસ ઇન્સ્પેક્ટર આર.એમ. ઠાકોર અને બીજા પોલીસ ઇન્સ્પેક્ટર જે.કે. ગઢવીના માર્ગદર્શન હેઠળ તથા સર્વેલન્સ પી.એસ.આઈ. વી.એમ. ડેરના નેતૃત્વમાં કરવામાં આવી હતી. જેમાં એ.એચ.સી. સરદારસંગ ધનજીભાઈ, કમલેશભાઈ લીલાભાઈ, સંજયભાઈ જશુભાઈ, મનોજભાઈ જગદીશભાઈ, રમતુજભાઈ લેભુજ તથા લાલાભાઈ લક્ષ્મણભાઈ અને એ.પી.કો. નાગેન્દ્રસિંહ રાજસિંહ સહિતના પોલીસ કર્મચારીઓ જોડાયા હતા. ઉધના પોલીસની આ સફળ કામગીરીથી મોબાઇલ લૂંટ અને ચોરીની પાંચ ઘટનાઓનો ભેદ ઉકેલાયો છે અને ગુનામાં સંડોવાયેલા પાંચ આરોપીઓને ઝડપી પાડવામાં પોલીસને સફળતા મળી છે.