ખેડૂત સહકારી ખાંડ ઉદ્યોગ મંડળી લી., બારડોલીમાં વ્યવસ્થાપક સમિતિની મુદત પૂર્ણ થતાં તાત્કાલિક કસ્ટોડિયનની નિમણૂક કરવા રજૂઆત

બારડોલી ખાતે આવેલી પ્રખ્યાત શ્રી ખેડૂત સહકારી ખાંડ ઉદ્યોગ મંડળી લિ.ની હાલની વ્યવસ્થાપક સમિતિની પાંચ વર્ષની મુદત આજથી એટલે કે તા. ૨૮/૧૧/૨૦૨૫ના રોજ સત્તાવાર રીતે પૂર્ણ થઈ ગઈ છે. આ સમિતિની ચૂંટણી તા. ૨૮/૧૧/૨૦૨૦ના રોજ જાહેર થયેલી અને તે મુજબ તેમનો કાર્યકાળ આજથી સમાપ્ત થયો છે.

આ સંજોગોમાં સહકારી મંડળીના હજારો ખેડૂત સભાસદોના હિતને ધ્યાનમાં રાખીને, મંડળીનું વહીવટી કારભાર અને ચૂંટણી પ્રક્રિયા નિયત સમયે પૂર્ણ થાય તે માટે ગુજરાત સહકારી મંડળીઓ અધિનિયમ-૧૯૬૧ની કલમ ૭૪(ડી) હેઠળ તાત્કાલિક કસ્ટોડિયન (વહીવટકર્તા)ની નિમણૂક કરવા બારડોલીના પ્રખ્યાત મહિલા આગેવાન તથા સહકારી ક્ષેત્રે સક્રિય કાર્યકર શ્રીમતી સ્વાતિબેન પટેલ દ્વારા માનનીય રજિસ્ટ્રારશ્રી, સહકારી મંડળીઓ, ગુજરાત રાજ્ય, ગાંધીનગર, નિયામકશ્રી, ખાંડ વિભાગ, ગુજરાત રાજ્ય, ગાંધીનગર, જિલ્લા રજિસ્ટ્રારશ્રી, સહકારી મંડળીઓ, સુરત. મુજબના ઉચ્ચ અધિકારીઓને લેખિત રજૂઆત કરવામાં આવી છે. આ રજૂઆતમાં ખાસ ભાર મૂકવામાં આવ્યો છે કે, મંડળીનો વહીવટ નિષ્ક્રિય ન થાય, ખેડૂતોની ચૂંટણી પ્રક્રિયા ઝડપથી પૂર્ણ થાય અને નવી સમિતિની રચના થાય તે માટે તાત્કાલિક કસ્ટોડિયનની નિમણૂક જરૂરી છે.