વેરા વિવાદનો અંત - વડોદરામાં રેલવેએ VMC ને ચૂકવ્યા ₹2 કરોડ
વડોદરા મહાનગરપાલિકા અને રેલવે વચ્ચે પાછલા કેટલાક સમયથી ચાલી રહેલા મિલ્કત વેરા વિવાદનો આખરે અંત આવ્યોછે. અદાલતના સ્પષ્ટ ચુકાદા બાદ રેલવે તંત્રે ઝૂકવું પડ્યું છે અને લાંબા સમયથી બાકી રહેલા રૂ. 7 કરોડના કુલ વેરામાંથી તત્કાળ રૂ. 2 કરોડની રકમ VMCને ચૂકવી આપી હોવાનું જાણવા મળે છે.
સુત્રો પાસેથી પ્રાપ્ત માહિતી અનુસાર, વડોદરા મહાનગરપાલિકા દ્વારા રેલવેની જમીન અને મિલકતો પરના બાકી મિલકત વેરાની વસૂલાત માટે કાયદાકીય લડત આપવામાં આવી રહી હતી. આ વિવાદ આખરે સુપ્રીમ કોર્ટ સુધી પહોંચ્યો હતો, જ્યાં કોર્ટે VMCની તરફેણમાં ચુકાદો આપ્યો હતો. સુપ્રીમ કોર્ટના આ ચુકાદાના પગલે રેલવે તંત્રએ બાકી વેરો ભરવાની તૈયારી દર્શાવી છે. રેલવે તરફથી VMCને કુલ રૂ. 7 કરોડના બાકી વેરા પેટે પ્રથમ હપ્તા તરીકે રૂ. 2 કરોડનો ચેક સુપરત કરવામાં આવ્યો છે. VMCના સૂત્રોએ જણાવ્યું હતું કે રેલવે દ્વારા બાકી રહેલો રૂ. 5 કરોડનો વેરો પણ ટૂંક સમયમાં જ ભરપાઈ કરી દેવામાં આવશે. આ સાથે જ વડોદરા મહાનગરપાલિકાની તિજોરીમાં એક મોટી રકમ જમા થશે, જે શહેરના વિકાસ કાર્યોમાં ઉપયોગી બનશે. લાંબા સમયથી ચાલતા આ વિવાદના સમાધાનથી VMCને મોટી રાહત મળી હોવાનું જાણવા મળે છે.