દારૂ અને ડ્રગ્સના મુદ્દે ગંભીર હોય તો તાત્કાલિક સર્વપક્ષીય બેઠક બોલાવે: ગોપાલ ઇટાલીયા

આમ આદમી પાર્ટીના વિસાવદરના ધારાસભ્ય ગોપાલ ઇટાલિયાએ રાજ્યના ગૃહમંત્રી હર્ષ સંધવીને પત્ર લખીને ગુજરાતમાં દારૂ અને ડ્રગ્સના દૂષણ પર પ્રતિબંધ મુકવાની માંગણી કરી. આ મુદ્દે ગોપાલ ઈટાલિયાએ જણાવ્યું હતું કે, જો ગૃહમંત્રી દારૂ અને ડ્રગ્સના મુદ્દા ઉપર ચિંતિત અને ગંભીર હોય તો તાત્કાલિક વિધાનસભામાં જે પણ પાર્ટીના ધારાસભ્ય છે એ તમામ પાર્ટીઓને સર્વપક્ષીય મીટીંગ બોલાવવામાં આવે અને એની અંદર વિસ્તૃત ચર્ચા કરવામાં આવે. વિધાનસભામાં અનેક વખત જોયું છે કે સર્વપક્ષીય ક્રિકેટ મેચ યોજાય છે એમાં બધા ધારાસભ્યો મેચ રમે છે અને જનતાના પૈસે મજા કરે છે. વિધાનસભાની અંદર સર્વપક્ષીય સાંસ્કૃતિક તહેવારો ઉજવાય છે, સામુહિક ભોજન થાય છે, નવા વર્ષના સ્નેહ મિલન યોજાય છે તો પછી દારૂના મુદ્દે સર્વપક્ષીય બેઠક કેમ મળવી જોઈએ નહીં? જો ગુજરાતના ગૃહમંત્રીને ખરેખર દારૂ અને ડ્રગ્સના દૂષણ ઉપર પ્રતિબંધ આવવો જોઈએ એવી જો ચિંતા હોય તો તાત્કાલિક સર્વપક્ષીય બેઠક ગૃહમંત્રીની અધ્યક્ષતામાં બોલાવવામાં આવે. એમાં બધી પાર્ટીનું ડેલીગેશન જશે. સૂચનાઓ આપશે, રજૂઆત કરશે, સંવાદ કરશે અને મીટીંગના અંતે દારૂ અને ડ્રગ્સના પ્રતિબંધો બાબતે જે સર્વ સંમતિ થાય એ બાબત ગુજરાત વિધાનસભાનું ફેબ્રુઆરીનું જે સત્ર છે એની અંદર મૂકવામાં આવે. સવારના 10 વાગ્યાથી સાંજના પાંચ વાગ્યા સુધી ચર્ચા અને મંથન કરવામાં આવે દારૂ અને ડ્રગ્સના કાયદામાં શું સુધારા વધારા કરવા જેવું છે, પોલીસ જે કેસની તપાસ કરે છે એ પ્રોસેસની અંદર શું સુધારા વધારા કરવાની જરૂર છે, આરોપીઓને જે જામીન મળે છે, કોર્ટની જે પ્રક્રિયા છે એમાં શું સુધારા વધારા કરી શકાય આ બધા જ વિષયો ઉપર સર્વપક્ષીય બેઠક કેમ મળવી જોઈએ નહીં?

ગોપાલ ઈટાલિયાએ રાજકીય વ્યક્તિઓ અને જવાબદાર અધિકારીઓની જવાબદારી ફિક્સ કરવાની વાત કરતા જણાવ્યું હતું કે, જે વિસ્તારમાંથી મોટા પ્રમાણમાં દારૂ પકડાય એ વિસ્તારના જવાબદાર અધિકારી ઉપર પણ એફઆઇઆર થવી જોઈએ અથવા એ વિસ્તારના રાજકીય માણસોની જવાબદારી પણ ફિક્સ કરવી જોઈએ. સરપંચ, તાલુકા સભ્ય, જિલ્લા સભ્ય, નગરપાલિકાના કોર્પોરેટર, મહાનગર પાલિકાના કોર્પોરેટર, ધારાસભ્ય અને સાંસદ સભ્ય આટલા લોકોની જવાબદારી પણ કાયદામાં ફિક્સ કરવી જોઈએ. જે વિસ્તારમાંથી દારૂ પકડાય એ વિસ્તારના રાજકીય વ્યક્તિઓએ અને એ વિસ્તારના સરકારી નોકરીયાતો બધાની જવાબદારી ફિક્સ થાય એવો કાયદો બનાવવો જોઈએ અથવા જનતાના હાથમાં કેટલીક સત્તા આપવી જોઈએ. કાયદામાં સુધારો કરીને જનતા રેડનું પ્રોવિશન કરવું જોઈએ. જો લોકો મળીને જનતા રેડ કરવા માંગતા હોય તો એ લોકોના નામ અને સરનામું ઓનલાઈન રજીસ્ટ્રેશન કરાવી એ લોકોને જનતા રેડ કરવાનું લાયસન્સ આપવું જોઈએ. લાયસન્સ મળ્યા બાદ એ લોકો ક્યાંય પણ રેડ કરી શકે એવું એક પોર્ટલ બનાવવું જોઈએ.

જીગ્નેશ મેવાણી જેવા ધારાસભ્ય કક્ષાના વ્યક્તિની સામે બુટલેગર, બુટલેગરનો પરિવાર, પોલીસ અને હર્ષ સંઘવી બધા જ સામે પડ્યા છે તો પછી આમ જનતાના શું હાલ થાય? લાઈવ કેમેરા સાથે કઈ પાર્ટીના નેતા શું બોલ્યા અને કઈ પાર્ટીના નેતાએ કંઈ રજૂઆત કરી એ આખા ગુજરાતને જાણવા મળે એવી મીટીંગ નું આયોજન ગૃહમંત્રી હર્ષ સંધવીના નેતૃત્વમાં કરવામાં આવે એવી મારી માંગણી છે. અનેક ગરીબ અને લાચાર માણસો મોતના ખપ્પરમાં હોમાઈ ચૂક્યા છે. હજુ પણ વધારે જિંદગી બરબાદ થવા દેવી હોય નહીં તો આશા રાખું છું કે ગુજરાતની સરકાર તાત્કાલિક સર્વપક્ષીય બેઠક બોલાવશે. દારૂ અને ડ્રગ્સના મુદ્દે કંઈક સકારાત્મક નિર્ણય લઈ કાયદામાં અને કાયદાની પ્રક્રિયામાં, કોર્ટ પ્રોસેસમાં, મેડિકલ એક્ઝામિનેશનમાં, ફોરેન્સિક રિપોર્ટ બધામાં જે પણ સુધારા વધારા કરવાના હોય એનો નિર્ણય એ મિટિંગમાં લેવામાં આવશે અને એનું બિલ બનાવી વિધાનસભાના ફેબ્રુઆરીના સત્રમાં ખરડો પસાર કરવામાં આવે એવી અમારી રજૂઆત છે.