પોલીસ અધિકારીઓ સમક્ષ શરતમાં ફેરફાર માટે આસારામની હાઇકોર્ટમાં રીટ

છ નવેમ્બરના રોજ હાઈકોર્ટે આસારામને 2013 ના બળાત્કાર કેસમાં ગાંધીનગરની સેશન્સ કોર્ટ દ્વારા દોષિત ઠેરવવામાં આવેલા અને આજીવન કેદની સજા ભોગવી રહેલા આસારામને છ મહિનાની સજા સ્થગિત કરવાની મંજૂરી આપી છ મહિનાના જામીન આપ્યા હતા.

આસારામને આપવામાં આવેલા જામીનની શરતોમાં ફેરફાર કરવા માટે તેણે હાઈકોર્ટમાં અરજી કરી છે. જે અરજીમાં હાઇકોર્ટે પ્રતિવાદી ઓથોરિટીને નોટિસ પાઠવી છે અને કેસની સુનાવણી 1લી ડિસેમ્બરના રોજ મુકરર કરી છે. બળાત્કારના કેસમાં તેમની આજીવન કેદની સજા સ્થગિત કરવામાં આવી છે. જોકે છ મહિનાના જામીનના સમયગાળા દરમિયાન તેની આસપાસ ત્રણ પોલીસ અધિકારીઓની હાજરીની શરતમાં ફેરફાર કરી આપવા અથવા તો તેને કાઢી નાખવાની માંગ કરવામાં આવી છે.
આ કેસની સુનાવણી જસ્ટિસ ઈલેશ જે. વોરા અને જસ્ટિસ આર.ટી. વાચ્છાણીની ડિવિઝન બેન્ચ સમક્ષ થઈ હતી. અગાઉ 21મી નવેમ્બરના રોજ સુનાવણી દરમિયાન કોર્ટે રાજ્યને નોટિસ જારી કરતી વખતે વકીલને મૌખિક રીતે કહ્યું હતું કે, પોલીસ અધિકારીઓની ચોવીસ કલાક હાજરી જરૂરી છે કે નહીં તેના પર વિચાર કરો. રાજ્ય સરકાર તરફથી વકીલે કહ્યું હતું કે ગયા મહિને રાજસ્થાન હાઈકોર્ટે આસારામની તબીબી સ્થિતિને ધ્યાનમાં રાખીને તેમની સજા સ્થગિત કરી હતી તે નોંધ્યા પછી હાઈકોર્ટે આ મહિનાની શરૂઆતમાં સજા સ્થગિત કરી હતી.
ઉલ્લેખનીય છે કે રાજસ્થાન હાઈકોર્ટે ગયા મહિને આસારામની સજા છ મહિના માટે સસ્પેન્શન આપી હતી. અને તેની તબીબી સ્થિતિને ધ્યાનમાં રાખીને તેને વચગાળાના જામીન પર મુક્ત કર્યા હતા. કારણ કે તેની તબીબી સ્થિતિમાં જે પ્રકારની સારવારની જરૂર છે એવી જરૂરી સુવિધાઓ જેલમાં ઉપલબ્ધ નથી. નોંધનીય છે કે જોધપુર સેશન્સ કોર્ટે એપ્રિલ 2018 માં આસારામને 2013 માં તેમના આશ્રમમાં એક સગીર પર બળાત્કાર કરવાના આરોપમાં આજીવન કેદની સજા ફટકારી હતી.