ભારત બિલ પેમેન્ટ સિસ્ટમ (BBPS) એપ્લીકેશન મારફત ઇ-મેમોની સીધી ચુકવણીની સુવિધા શરુ

નાયબ મુખ્યમંત્રી હર્ષ સંઘવી અને રાજ્યના પોલીસ વડા વિકાસ સહાયના માર્ગદર્શન હેઠળ સ્ટેટ ટ્રાફિક બ્રાન્ચ દ્વારા ભારતીય સ્ટેટ બેંક (SBI) સાથેના MoU અંતર્ગત ભારત બિલ પેમેન્ટ સિસ્ટમ (BBPS) મારફતે દંડની ઓનલાઈન ચુકવણીની સુવિધા શરૂ કરવામાં આવી છે. આ નવી સુવિધા શરૂ થયા બાદ નાગરિકો તરફથી ખૂબ સારો પ્રતિસાદ મળી રહ્યો છે. 1લી ઓક્ટોબરથી 24મી, નવેમ્બર-2025 સુધીના સમય ગાળામાં રૂ. 18.05 લાખથી વધુ રકમનો ચલણ દંડ ઓનલાઈન આ સરળ પ્રક્રિયા મારફતે ભરવામાં આવ્યો છે. BBPS મારફતે ચુકવણીનું પ્રમાણ સતત વધી રહ્યું છે. આ અગાઉ વર્ષ 2023થી વન નેશન, વન ચલણ-One Nation One Challan એપલીકેશન દ્વારા ,રવટ બેંકિંગ, ડેબિટ-ક્રેડિટ કાર્ડ, UPI અને PoS મારફત દંડ ભરવાની સુવિધા હતી. હવે તેમાં વધારો કરીને ગૂગલ-પે, ફોન-પે, ભીમ-પે અને યોનો (YONO) એપ્લિકેશન મારફત વાહન ચાલકો સીધે-સીધી દંડની રકમ ભરપાઈ કરી શકે છે. ચુકવણી કરવા માટે, એપ્લિકેશન પર જઈને સ્ટેટ ટ્રાફિક બ્રાન્ચ, ગુજરાત ઓપ્શન પસંદ કરીને પેમેન્ટ કરવાનું રહેશે.

પોલીસની જનતાને અપીલ
>> બાકી દંડની રકમ તાત્કાલિક ભરી દોઃ વાહનચાલકોને ઇસ્યુ થયેલા ઇ-ચલણનો બાકી દંડ ભરવા માટે ફોન-પે (PhonePe), ગૂગલ-પે (Google Pay), અને યોનો (YONO) જેવી BBPS સુવિધાઓનો મહત્તમ ઉપયોગ કરવા વિનંતી છે.
» કોર્ટની કાર્યવાહીથી બચો: 90 દિવસ પછી ચલણ વર્ચ્યુઅલ કોર્ટ (Virtual Court) માં ટ્રાન્સફર થઈ જાય છે, જેના કારણે ચુકવણીની પ્રક્રિયા વધુ જટિલ બની જાય છે. તેથી, ચલણ કોર્ટમાં જાય તે પહેલાં BBPS જેવી સરળ ઓનલાઇન સુવિધાઓનો ઉપયોગ કરીને દંડ ભરી દેવા વિનંતી છે.

» 90 દિવસની સમય મર્યાદાનું ધ્યાન રાખો: આ સરળ પ્રક્રિયા દ્વારા માત્ર છેલ્લા 90 દિવસમાં ઇસ્યુ થયેલા ઇ-ચલણનો દંડ ભરી શકાશે.