સુરત જિલ્લા ન્યાયાલય ખાતે સુરત જિલ્લાના વિવિધ ઉધોગ એસોશીએશનના હોદ્દેદારોની હાજરીમાં લોક અદાલત જાગૃતિ સંદર્ભે કાર્યક્રમ યોજાયો

જિલ્લા કાનૂની સેવા સત્તામંડળ (DLSA), સુરત દ્વારા આગામી તા. ૧૩-૧૨-૨૦૨૫ ના રોજ યોજાનાર રાષ્ટ્રીય લોક અદાલત સંદર્ભે સુરત જિલ્લા ખાતે આવેલ મહત્વના ધંધાકીય વર્ગ જેવા કે ડાયમંડ, ટેક્ષટાઈલ, રીયલ એસ્ટેટ, ચેમ્બર ઓફ કોમર્સ, ફોસ્ટા અને જરી વગેરેના પ્રતિષ્ઠિત એસોશીએશનના ઓફિસ બેરર્સને લોક અદાલત જાગૃતિ અંગેના કાર્યક્રમમાં હાજર રહેવા નિમંત્રણ પાઠવવામાં આવેલ હતું. તા.૨૭-૧૧-૨૦૨૫ ના રોજ સુરત જિલ્લાના તમામ એસોશીએશનના ઓફિસ બેરર્સ, સુરત જિલ્લા કોર્ટના ડીસ્ટ્રીકટ ગર્વમેન્ટ પ્લીડર, સુરત ડીસ્ટ્રીકટ બાર એસોશીએશનના પ્રમુખશ્રી બ્રિજેશભાઈ પટેલ, સુરત સીટી બાર એસોશીએશનના પ્રમુખ શ્રી નિલકંઠભાઈ બારોટ તેમજ અન્ય સીનીયર વકિલશ્રીઓ ડીસ્ટ્રીકટ કોર્ટ, અઠવાલાઈન્સ, સુરત ખાતે હાજર રહેલ હતા. જિલ્લા કાનૂની સેવા સત્તામંડળ, સુરતના અધ્યક્ષ અને મુખ્ય જિલ્લા ન્યાયાધીશશ્રી રાહુલ ત્રિવેદી સાહેબનાઓએ લોક અદાલતની કાર્યવાહી અને લોક અદાલતના માધ્યમથી સમાધાન કરવાથી થતાં ફાયદાઓ તેમજ વૈકલ્પિક વિવાદ નિવારણ પદ્ધતિ વિશે વિસ્તૃત માહિતી આપેલ હતી અને લોક અદાલત વિશે આમ જનતાને જાગૃત કરી શકાય અને તેઓનો વિશ્વાસ લોક અદાલત થી થતા સરળ, ત્વરિત અને ઝડપી ન્યાય તરફ વધારી શકાય તે બાબતે એક અનોખી પહેલ કરવામાં આવી છે. પ્રથમવાર કહી શકાય એવી એક લોક અદાલત અવેરનેસ મીટ કરવામાં આવી જેમાં શહેરના અલગ અલગ ઉધોગો સાથે જોડાયેલા તમામ અસોસિએશનના પ્રમુખો અને હોદ્દેદારોએ ઉત્સાહપૂર્વક ભાગ લીધો હતો અને તેઓને અન્ય લોકોમાં પણ લોક અદાલતની જાગૃતિ ફેલાવવા માટેની અપિલ કરવામાં આવેલ હતી.