સોલાર પેનલ પરનો જીએસટી ઘટ્યો પણ ઉત્પદકોને વર્કિંગ કેપિટલ વધારવાની ફરજ

સોલાર પેનલ પરના જીએસટીના દર ૧૨ ટકાથી ઘટાડીને પાંચ ટકા કરી દેવામાં આવ્યા તે પછી લોકોને સોલાર પેનલ થોડી ગણી સસ્તી મળતી થઈ હશે, પરંતુ પેનલ મેન્યુફેક્ચરર્સની હાલાકી વધી ગઈ છે કારણ કે સોલાર પેનલ બનાવવા માટેના કાચા માલ પર તેમણે વધુ જીએસટી ચૂકવવો પડતો હોવાથી તેમના ઇનપુટ ટેક્સ ક્રેડિટના નાણાં સરકારમાં જમા જ પડી રહે છે. કેન્દ્ર સરકારે તેમને જીએસટીનું રિફંડ આપવાની વ્યવસ્થા કરી હોવા છતાંય તેમના નાણાં સલવાયેલા પડયા રહે છે, કારણ કે લાંબા સમય સુધી તેમને રિફંડ મળતું જ નથી. પરિણામે નવ મૂડી ઉમેરતા રહેવાની ફરજ પડી રહી છે. સોલાર પેનલ મેન્યુફેક્ચરિંગ સાથે સંકળાયેલા સૂત્રોનું કહેવું છે કે અત્યારે સોલાર પેનલ માટે જોઈતા એલ્યુમિનિયમ પર ૧૮ ટકા, ગ્લાસ પર ૧૮ ટકા અને તેને માટેના લેબર ખર્ચ પર ૧૮ ટકા જૌસટી ભરવાનો આવે છે. પરિણામે દરેક વેચાણ પર મેન્યુફેક્ચરર્સના સાતથી નવ ટકાની ઇનપુટ ટેક્સ ક્રેડિટ ફસાયેલી પડી રહે છે. પરિણામે તેમણે સતત નવી વર્કિંગ કેપિટલ ઉમેરવી પડે છે. જીએસટીનો અમલ થયો ત્યારે પણ સોલાર પેનલ પર ૫ ટકા જીએસટી હતો. પરંતુ તેમની ઇનપુટ ટેક્સ ક્રેડિટ ન મળતી હોવાથી તેમણે રજૂઆત કરતાં તેના પરનો જીએસટી વધારીને ૧ર ટકા કરી દીધો છે.હવે ૧ર ટકાનો સ્લેબ કાઢી નાખ્યો છે. હવે ૫, ૧૮, અને ૪૦ ટકાનો સ્લેબ જ રાખવામાં આવ્યો છે.