ઉમેદવારોની ડિપોઝીટ ફીમાં કરાયેલા વધારાથી વકીલ મંડળને ચાર લાખથી વધુની આવકની શક્યતા

સુરત જિલ્લા વકીલ મંડળની ચૂંટણીનો પ્રચાર જોરશોરમાં કરવામાં આવી રહ્યો છે. કી પોસ્ટ ગણાતી પ્રમુખ અને સેક્રેટરીની પોસ્ટ તેમજ ઉપપ્રમુખની પોસ્ટમાં એકબીજા ઉમેદવારને બેસાડવા માટે પણ ગ્રૂપ મિટિંગો શરૂ કરી દેવામાં આવી છે. આ બધાની વચ્ચે સુરત વકીલ મંડળ દ્વારા વર્ષ દરમિયાન એકપણ સામાન્ય સભા કર્યા વિના કાઉન્સિલ અને કો-ઓપ્ટની મિટિંગમાં ઉમેદવારોની ડિપોઝિટ ફીમાં કરાયેલા ધરખમ વધારાનો ભારે વિરોધ કરાઇ રહ્યો છે. વકીલોમાં છૂપો રોષ પણ જોવા મળી રહ્યો છે અને એવી ચર્ચા થઇ રહી છે કે, આ વધારો મોટાગજાના અને આર્થિક રીતે સધ્ધર વકીલો જ ઇલેક્શન લડી શકે તે માટે કરાયો છે. ફી વધારાના કારણે હાલમાં પ્રમુખ પદના ત્રણ ઉમેદવારો, ઉપપ્રમખ પદના ત્રણ ઉમેદવારો, સેક્રેટરીમાં ચાર ઉમેદવારો, જોઈન્ટ સેક્રેટરીમાં ત્રણ ઉમેદવારો તેમજ ખજાનચીમાં એક મહિલા સહિતના ત્રણ ઉમેદવારો મેદાનમાં છે, આ ઉપરાંત એલઆરની પોસ્ટ ઉપર પણ ત્રણ મહિલાઓ પ્રચાર કરી રહી છે, જયારે કાઉન્સિલ સભ્ય બનવા ઇચ્છતા જુનિયર વકીલો પણ અંદાજિત ૨૦થી વધુ જોવા મળી રહ્યા છે. સુરત વકીલ મંડળને આ વર્ષે એક ઇલેક્શનમાં જ ચાર લાખથી વધુની આવક થાય તેવી શક્યતા છે.