બે કરોડથી વધુ સોના-હીરાના દાગીનાની ચોરીના કેસમાં આરોપીના જામીન મંજૂર

સુરત શહેરના ઉમરા પોલીસ મથકમાં રૂ. ૨ કરોડથી વધુ કિંમતના સોનાની ચોરીના કેસમાં ધરપકડ કરાયેલા મનોજ કંસારાના ગુજરાત હાઈકોર્ટે જામીન મંજૂર કર્યા હતા. આરોપી અને તેની પત્ની ખુશ્બુ કંસારએ સાથે મળી સુરભી જવેલર્સમાંથી આશરે ૧૭૦૦ ગ્રામ સોનું અને હીરાના દાગીના સગેવગે કર્યાનો આરોપ હતો.

પ્રાપ્ત થતી માહિતી અનુસાર ઉમરા પોલીસ મથકમાં નોંધાયેલી ફરિયાદ મુજબ ૧ જાન્યુઆરી, ૨૦૨૪ થી ૮ સપ્ટેમ્બર, ૨૦૨૫ વચ્ચે સુરભી જવેલર્સમાં કામ કરતા આરોપી ખુશ્બુ કંસારાએ દુકાનમાંથી ૧૮ અને ૨૪ કેરેટ સોનાના સ્ક્રૂ, ચેન, વાયર અને હીરા જડિત દાગીનાની ચોરી કરી હતી. ચોરાયેલા દાગીનાની કુલ કિંમત રૂ. ૨.૦૫ કરોડથી વધુ હોવાનો અંદાજ છે. ફરિયાદના આધારે પોલીસે મનોજ કંસારાની ધરપકડ કરી અને તેમ કોર્ટમાં રજૂ કર્યો હતો. ત્યારબાદ મનોજે હાઇકોર્ટમાં જામીન અરજી દાખલ કરી હોવાનું જાણવા મળે છે.
બચાવ પક્ષે એડવોકેટ નીરવ પંડ્યા, ધાર્મિક ખડાવાલા અને સમીર કાબરાવાલાએ દલીલ કરી હતી કે ઘટનાના લગભગ દોઢ વર્ષ બાદ ફરિયાદ દાખલ કરવામાં આવી હતી, જે શંકા ઉપજાવે છે. વધુમાં આટલી મોટી ચોરી થઈ હોવા છતાં તાત્કાલિક રિપોર્ટ દાખલ કરવામાં નિષ્ફળતા ફરિયાદીના હેતુઓ પર પ્રશ્નો ઉભા કરે છે. અને એવી પણ દલીલ થઈ કે ફરિયાદીએ કરચોરી કરવા માટે ખોટી ફરિયાદ દાખલ કરી હતી. તમામ સંજોગોને ધ્યાનમાં રાખીને હાઈકોર્ટે આરોપી મનોજ કંસારાના શરતી જામીન મંજૂર કર્યા હોવાનું જાણવા મળે છે.