100 કરોડના ઇનપુટ ટેક્સ ક્રેડિટ કૌભાંડમાં આરોપીના જામીન ફરી નામંજૂર

100 કરોડથી વધુના બનાવટી ITC (ઇનપુટ ટેક્સ ક્રેડિટ) કૌભાંડના મુખ્ય આરોપી હિમાંશુ રજનીકાંત શાહની વચગાળાના જામીનની ત્રીજી અરજી પણ આજે કોર્ટે નામંજૂર કરી હોવાનું જાણવા મળે છે.

પ્રાપ્ત માહિતી અનુસાર આ કેસમાં આરોપી પર CGST ઍક્ટ-2017ની કલમ હેઠળ આરોપ છે કે, તેણે 100 કરોડની બનાવટી ITC મેળવી અને 90 કરોડની ITC પાસ-ઓન કરી સરકારી ખજાનાને નુકસાન પહોંચાડ્યું છે. આરોપીની તબિયતના આધારે દાખલ કરાયેલી વચગાળાના જામીનની અરજીમાં તેમના વકીલે દલીલ કરી હતી કે, આરોપી છેલ્લા 7 દિવસથી સિવિલ હોસ્પિટલના ICUમાં છે. તાત્કાલિક મેન્જિયોપ્લાસ્ટીની જરૂર છે. છેલ્લા 10 વર્ષથી હ્રદયરોગનો દર્દી છે. કોર્ટે આ દલીલોને ગંભીરતાથી લીધી અને સિવિલ હૉસ્પિટલના તબીબી અહેવાલ મંગાવ્યો હતો. ડૉક્ટરના રિપોર્ટમાં જણાવાયું હતું કે, આરોપીને તાત્કાલિક અન્ય હોસ્પિટલમાં શિહદ કરવાની કોઈ જરૂર નથી. સુરત સિવિલ હોસ્પિટલમાં જ તેમની સારવાર યોગ્ય રીતે થઈ શકે છે. તેમજ આરોપીની અગાઉની બે જામીન અરજી નામંજૂર થઈ ચૂકી છે. ચુનાની ગંભીરતા અને આરોપીની ભૂમિકા ધ્યાનમાં લેતાં વચગાળાના જામીન આપવું યોગ્ય નથી. આથી કોર્ટે આજે આ અરજી નામંજૂર કરી હોવાનું જાણવા મળે છે.